Baukau, 26 Setembru 2023 - Sekretáriu Estadu Dezenvolvimentu Lokál (SEDL), Mateus dos Santos Tallo, hateten katak governu ba dasia liuhosi SEDL iha kompromisu atu apoiu suku sira ne'ebé mak kreativu no inovativu, harii sentru ka grupu sira kona-ba agrikultura, akuakultura, pekuária no seluseluk tan. Nune'e grupu ka sentru sira ne'e bele iha nia sustentabilidade, hodi dezenvolve kresimentu ekonómia lokál. 

"Ohin hau mai to'o iha ne'e atu haree progresu sira iha sentru komite Programa Movimentu Hafoun Aldeia (PMOHA) ida ne'e, atu nune'e ita bele haree segimentu sira ba oin, liuliu aloka orsamentu hodi investe iha setór produtivu sira ne'ebé sai poténsia iha suku Buibau, tanba polítika governu ba dasia nian sei foka ba hasa'e kresimentu ekonómia lokál, espesiál iha suku sira. Tanba nee hahú tinan ida ne'e ita sei foka liu ba iha setór potensiál sira iha nível postu, suku to'o aldeia sira",  dehan Mateus bainhira halo vizita ba sentru komite PMOHA iha aldea Buibau, suku Buibau, postu administrativu Baucau vila, munisipiu Baucau.

Mateus hateten tan katak, SEDL sei fó apoiu ba populasaun ne'ebé iha kreatividade atu halo serbisu di'ak, no iha kbiit inovativu atu kria obra produtu lokál foun iha nível baze, ho nune'e bele hasa'e kresimentu ekonómia suku no aldeia sira. Tanba ne'e iha futuru sei hadi'a programa dezenvolvimentu ekonómia lokál, no haree filafali matadalan ka polítika ba postu administrativu, inklui inisiativa sira atu dezenvolve suku sai di'ak no produtivu liután.