Bobonaru, 05 Outubru 2023 - Sekretáriu Estadu Dezenvolvimentu Lokál (SEDL), Mateus dos Santos Tallo, iha Kinta (05/10) ne'e observa direta sidadaun ho naran João Francelino nia rezidénsia iha suku Maliubu, postu adminístrativu Bobonaru, munisípiu Bobonaru ne'ebé mak ho kondisaun la seguru no ameasa daudaun atu monu. Hafoin vizita Mateus orienta kedas diretór PNDS munisípiu Bobonaru ho fornesedór ne'ebe mak atu kaer projetu Uma Naroman ba Povu (UNP), atu tau iha lista prioridade hodi konstrui urjénsia sidadaun refere nia uma, nune'e bele asegura nia hosi anin no udan nia ameasa. 

João Francelino ho idade 70 moris faluk, laiha fen no oan agora daudaun ne'e hela mesak deit iha uma ida ho medida 3mx4m, didin hosi ai rohan rohan, karik iha tempu udan no anin boot la fó seguru ba nia atu hela ho hakmatek. Maske nune'e iha tinan ne'e lori haksolok ba João tanba nia naran tama iha lista benifisiáriu sira ne'ebé mak atu simu fasilidade UNP, hosi Programa Nasionál Dezenvolvimentu Suku (PNDS) nian. Maibé João rasik seidauk hatene bainhira mak uma ne'e atu hahú nia konstrusaun, hodi hela provizóriu iha nia uma atuál hodi hein.