Dili, 21 Setembru 2021- Governu liuhosi Sekretáriu Estadu Formasaun Profisionál no Empregu (SEFOPE) Alarico de Rosário, tersa (21/09) ne’e, iha salaun SEFOPE Kaikoli, Dili, asina kontratu ho grupu auto-empregu 34 ne’ebé tinan ne’e hetan apoiu finanseiru hosi SEFOPE.
Iha intervista, Alarico de Rosário hateten, ohin asina kontratu ne’e ba etapa dahuluk, no grupu benefisiáriu hamutuk 34 ne’e hetan apoiu ho totál orsamentu $389,702.81.
Nia informa mós, iha fulan Outubru nia laran sei asina tán kontratu ba etapa daruak nian ho grupu auto-empregu hamutuk 12.
“Osamentu ne’ebé fó apoiu ba grupu auto-empregu, osan ne’e hosi orsamentu jerál estadu SEFOPE nian iha tinan 2021, tanba ne’e husu benefisiáriu sira atu utiliza osan ne’e hó di’ak nune’e bele hadi’a ekonómika família no mós bele fó servisu ba maluk joven sira seluk ne’ebé buka hela servisu,” esplika SEFOPE Alarico.
Governante ne’e mós husu ba grupu auto-empregu sira ne’ebé hetan apoiu, labele utiliza osan ne’e ba fali serimónia kulturál sira, maibé tenke utiliza bazeia ba proposta ne’ebé hatama ba iha SEFOPE, tanba ekipa SEFOPE sei servisu hamutuk ho Komisaun Anti Korupsaun (KAK) hodi halo monitorizasaun ba grupu sira ne’ebé hetan ona apoiu.
Fonte: Secretário Estado para Formação Profisional e Emprego (SEFOPE)