SEFOPE-DNEE REALIZA FORMASAUN PDB BA TIMOROAN 86 NE’EBÉ ATU BA SERVISU IHA AUSTRÁLIA
Dili, 10 Fevereiru 2022 - Sekretáriu Estadu Formasaun Profisionál no Empregu (SEFOPE), liuhosi Diresaun Nasionál Empregu Exteriór (DNEE), ohin (10/02) ne’e, realiza formasaun Pre-Departure Briefing (PDB) ba kandidatu traballadór na’in-86 ne’ebé sei ba servisu iha Austrália iha fulan Fevereiru no Marsu tinan ne’e.
Diretór DNEE, Filomeno Soares hateten, programa formasaun PDB realiza antes traballadór atu departilla hosi nasaun orijen ba servisu iha ema nia rai atu nune’e traballadór bele komprende no hatene disiplina servisu, kultura servisu, no regulamentu balun ne’ebé nasaun Austrália iha.
Diretór ne’e apelu ba traballadór sira atu aproveita oportunidade aprende nian ho di'ak, no nia husu mós ba traballadór sira wainhira ba servisu iha Austrália labele hasees an hosi sistema hodi fó biban ba empregadór sira iha Austrália simu nafatin joven timoroan ne’ebé hein hela oportunidade.
Enkuantu traballadór na’in-86 ne’e, sira na’in-22 sei servisu liuhosi programa Seasonal Worker Program (SWP) iha kompañia Grape-co, no na’in-64 servisu liuhosi programa Pacific Laboor Scheme (PLS) iha kompañia Berry Pays.
Fonte: Secretário Estado para Formação Profisional e Emprego (SEFOPE)
