Dili, 15 Dezembru 2021 – Sekretáriu Estadu Formasaun Profesionál no Empregu (SEFOPE) liuhosi Diresaun Nasionál Empregu Exteriór (DNEE), ohin (15/12) ofisialmente entrega traballadór Germenino de Deus nia isin mate ba família hodi halo serimónia funerál tuir tradisaun postu-administrativu Letefoho munisípiu Ermera nian.
Germenino de Deus hanesan traballadór timoroan ida ne’ebé ba servisu iha Austrália liuhosi programa Seasonal Worker Program (SWP) iha tinan 2019 no iha loron 23 novembru 2021 akontese insidente rai-lakan hodi rezulta traballadór ne’e lakon vida iha loron 27 novembru 2021 iha Ospitál Royal Darwin. No ohin kuarta (15/12) ne’e, matebian to’o iha Aeroportu Internasionál Nikolau Lobatu ho aviaun Airnorth no simu diretamente hosi diretór DNEE, Filomeno Soares ho ekipa hodi entrega ba família matebian.
Enkuantu diretór DNEE Filomeno Soares, reprezenta SEFOPE hato’o sentidu kondolénsia profundu ba família matebian no enkoraja espoza matebian, Maria Gorete hodi forsa nafatin hasoru situasaun susar ne’e.
Germenino de Deus moris iha loron 01 fulan Jullu tinan 1987 iha suku Dukurai, postu-administrativu Letefoho munisípiu Ermera.