Kovalima, 04 Outubru 2021 – Líder máximu Sekretaria Estadu Formasaun Profisionál no Empregu (SEFOPE) Alarico de Rosário, iha segunda (04/10) ne’e, halo abertura ba formasaun móvel área ospitalidade ne’ebé fasilita hosi sentru formasaun STVJ Komoro ba negosiante hamutuk ema na’in-30 iha suku Suai-Loro, postu-administrativu Suai, munisípiu Kovalima.
“SEFOPE iha setór formasaun ne'ebé konsidera produtivu alem-de konstrusaun sivíl, agrikultura, mina no gás, maibé área otelaria no atendimentu kliente mós sai prioridade ba ita. Tanba ne'e SEFOPE iha programa ida naran formasaun móvel ne'ebé fasilita hosi Diresaun Nasonál Formasaun Profisionál (DNFP), ba alvu hanesan empregadór sira ne'ebé hakarak hasa'e sira-nia rendimentu, hadi'a kualidade atendimentu no mós alarga tán negosiu,” dehan Alarico iha abertura ba formasaun refere iha Suai-Loro.
Nia afirma, SEFOPE observa katak fatin iha Suai-Loro potensiál tebes atu dezenvolve no SEFOPE hanoin katak investe iha suku refere ema sei lori rendimentu maka'as ba família sira ne'ebé hala'o negosiu.
Líder SEFOPE ne'e mós husu ba negosiante sira ne'ebé hetan oportunidade ne'e, atu aproveita ho didi'ak tanba bele ajuda sira atu aprende métodu foun ne'ebé sira sedauk hetan.
Fonte: Secretário Estado para Formação Profisional e Emprego (SEFOPE)