Manufahi, 22 Novembru 2021 – Sekretaria Estadu Joventude no Desportu (SEJD), liuhosi Sentru Foinsa'e Dom Boaventura Manufahi (CEFOBOM), iha segunda (22/11) ne’e, apoia fundu ho montante $45.000.00, ba grupu foinsa'e kreativu iha munisípiu Manufahi hodi dezenvolve atividade pekuária, agrikultura, no turizmu hodi aumenta rendimentu grupu foinsa’e sira nian.
Pontu fokál SEJD Livia Maria de Jesus hateten, fundu estimula emprendedorizmu sosiál apoia ba grupu foinsa'e kreativu iha suku, nu'udar programa SEJD nian liuhosi Diresaun Nasionál Asosiativizmu Juventude no mós Diresaun Kreatividade Nasionál Juventude, no programa refere realiza iha teritóriu Timór laran tomak ba suku 452, ho objetivu atu apoia foinsa'e sira nia forsa, poténsia, kapasidade no kreatividade oinsá mak atu solusiona problema ne'ebé joven sira enfrenta.
Enkuantu Jenerál Manajer CEFOBOM Antoninho Doutel Sarmento informa, fundu ho montante $45.000.00 ne'e, apoia ba postu-administrativu Turiskai $15.000.00, Same $10.000.00, Fatuberliu $10.000.00 no Alas $10.000.00.
Fonte: Diáriu "Roman ba Sosiedade" Manufahi