Dili, 12 Janeiru 2022- Seketáriu Estadu Juventude no Desportu (SEJD), Abrão Nokosiku Saldanha, iha kuarta (12/01) ne’e, entrega prémiu ba vensedór na'in-2, Adilson Bonifacio da Costa no Jorgino dos Santos, iha kompetisaun dezeñu Traze Nasionál Desportu ba kontinjente nasionál Timor-Leste nian.
“Ba Sr. Adilson no Jorgino ami apresia ita boot sira nia kreatividade, parabéns, Estadu foti ida ne’e hanesan rezultadu joven sira nian ne’ebé legaliza ho diploma Ministerial hodi uza ba kompetisaun Nasional,” dehan Abrão Saldanha.
SEJD esplika, durante ne’e kontinjente Timor Leste nian ne'ebé partisipa iha rai li'ur uza traze tuir de'it kontinjente ida-idak no federasaun nia hakarak, maibé iha ona uniformizasaun nune’e kontinjente sira ne’ebé partisipa iha rai li'ur sei uza traze tuir Timor Leste nia identidade.
Enkuantu SEJD atribui prémiu ba manán na'in rua, primeiru lugár Adilson Bonifacio da Costa ho orsamentu $3,000 no segundu lugár $ 2,000 no sertifikadu ba juri sira.
Kompetisaun ba dezeñu uniforme ne’e loke iha fulan novembru tinan 2021 ne’ebé partisipa desiner na'in 21 iha ne’ebé na'in hitu (7) konsege konkorre no rezultadu na'in rua mak sai manán na'in ne’ebé fó sai iha loron 11 janeiru 2022.
Fonte: Mídia Secretaria de Estado da Juventude e do Desporto (SEJD)