Dili, 24 Fevereiru 2022 - Nasaun haat ne’ebé hakat ba semi-finál Asian Football Federation (AFF) U-23 Championship 2022 mak hanesan Timor-Leste, Vietname, Tailándia no Laos.
Iha semi-finál ne’e Timor-Leste nia selesaun U-23 sei joga kontra selesaun U-23 Vietname nian no jogu refere sei hala’o ohin (24/2) kalan tuku 21:30 otl., iha estádiu nasionál Morodok Techno, Kamboja, tuir ESPN Football fó sai.
Molok jogu entre Timor-Leste kontra vietname, tuir oráriu, selesaun U-23 Laos nian sei joga uluk kontra Tailándia iha tuku 18:00 otl., iha estádiu ne’ebé hanesan.
Timor-Leste hosi hakat ba semi-finál hafoin sai kampeaun Grupu A nian ho pontu 7 sein lakon. Iha Grupu A, Timor-Leste empata 1-1 ho Filipina, manán Brunei Darusalam ho score 3-1 no manán uma-na’in Kamboja ho score 1-0.
Laos sai nu’udar kampeaun Grupu B nian ho pontu 6. Maske nune’e, iha Grupu B Indonézia no Myanmar la rezigna-an tanba kazu Covid-19, nune’e Laos ho Malázia joga dala rua Malázia no Laos manán hotu ho score 2-1 no 2-0.
Vietname sai nu’udar kampeaun Grupu C nian ho pontu 6 hafoin halakon Tailándia ho score 1-0 no halakon mós Singapura ho score 7-0. Enkuantu Tailándia okupa pozisaun daruak iha Grupu C ho pontu 3.
Provizoriamente, mellor markadór iha jogadór na’in-6 ho totál golu ne’ebé hanesan mak rua (2) ne’ebé inklui mós Mouzinho hosi Timor-Leste.
Fonte: ESPN Football