RAEOA, 11 outubru 2022 – Ekipa investigador no instrutor hosi Diresaun Jerál Servisu Migrasaun servisu hamutuk ho Organizasaun Internasional Migrasaun (IOM, sigla Ingés), kontinua halo sosializasaun ba lei migrasaun no azilu hanesan medida preventiva ida iha kontekstu luta kontra trafiku umanu iha Timor-Leste.

Diretor Jeral Servisu Migrasaun, Luis Baretto, hateten katak sosializasaun ne’e nu’udar esforsu ida atu hetan rezultadu ne’ebé di’ak liu iha kombate tráfiku umanu.

“Sosializasaun ne’e ita servisu hamutuk ho parseiru sira ho nia objetivu maka atu hare oinsá autoridade seguransa iha liña fronteira bele halo esforsu hodi bele hetan rezultadu ne’ebe másimu. Aleinde ida-ne’e mós atu iha aprosimasaun ba komunidade sira ne’ebé hela besik iha área fronteira hodi halo esforsu ida diak liu iha luta kontra tráfiku umanu”, esplika Luis Baretto, via telefónika iha tersa-feira, ohin (11/10).

Luis hateten katak medida preventivu iha kontekstu luta kontra trafiku umanu ne’e nia parte servisu hamutuk ho ajensia Organizasaun Nasoens Unidas (ONU) liuhosi Organizasaun Internasional ba Migrasaun (IOM).

“Atividade ne’e ita sei halo durante loron tolu nia laran hosi loron 11 to’o 13 outubru no ohin ita halo sosilaizasaun ne’e iha sesaun rua. Primeiru hala’o ba autoridade seguransa sira hosi Komandu PNTL RAEOA iha Santa Rosa no sesaun daruak nian iha salaun Madre Dominicana Oebau, RAEOA ho alvu maka ajente implementadór sira hanesan Autoridade sub-rejiaun sira, ajente seguransa, ajente justisa, ministériu relevantes no sosiedade sivíl sira ne’ebé durante ne’e presta servisu hodi fó protesaun ba iha vítima sira atu bele iha kuñesimentu no bele kontribui ba iha lei refere, liu-liu iha area fronteira ita sira”, Luis klarifika. 

Sosializasaun ne'e halo abertura direita hosi Vise-Prezidente RAEOA iha salaun Misionariu Madre Dominicana do Rosario Orbau-RAEOA, no hetan partisipasaun másimu hosi autoridade lokál, lider komunitaria, komandu PNTL RAEOA no komandante UPF, UPM, emprezariu lokál, sosiedade sivíl nomós estudante sira.