Manufahi, 02 Abril 2021 – Iha selebrasaun páskua ne’ebé tama iha loron koñesidu ho Sesta-Feira Santa, sarani igreja katólika iha suku Holarua, postu-administrativu Same, Manufahi, ohin (02/4), realiza viasakra ba iha foho Riamori, ho jestu banati tuir Jesus Kristu nia terus no mate iha krúz.
Iha observasaun, haree katak hahú hosi tuku 08:00 dadeer-saan sarani sira prepara-an iha foho Riamori ho fiar ne’ebé sira iha hodi partisipa iha prosesu viasakra iha Riamori nia tutun, hodi hanoin hikas Jesus Kristu nia terus no mate iha krúz iha foho Kalváriu.
Iha prosesu viasakra ne’e, sarani balu tanis wainhira asiste foinsa’e sira ne’ebé banati tuir Jesus nia terus, hodi leba krúz sa’e ba foho Riamori no hetan baku hosi foinsa’e sira seluk, to’o iha Riamori tutun hedi fali ba krúz, no ikus mai hakoi iha fatuk ku’ak ida ne’ebé sarani sira prepara ona.
Fonte: Diáriu "Roman ba Sosiedade" Manufahi