Dili, 08 Fevereiru 2022 - Diretór Sentru Formasaun Profesionál Tibar (SFPT), Simão Tito Barreto, informa katak, SFPT eziste durante tinan 20 hahú hosi 2002 to’o 2022 konsege prodús ona sertifikadu Profesionál ba juventude hosi munisípiu 12 inklui Rejiaun Administrativa Espesiál Oekusi Ambenu (RAEOA) na’in- 6.135, hosi númeru ne'e 80% mak asesu ona ba kampu traballu.
"Ami halo identifikasaun ba ita-nia graduadu sira ami rejistu hela pur volta 80% mak servisu. Sira restu pur volta 15% hanesan ne'e servisu tia lakon fali kontratu hanesan temporáriu no 5% mak kontinua hela estudu iha universidade," diretór SFPT hatete asuntu hirak ne’e liuhosi telefone, ohin (08/02) ne’e ba jornalista Timor News.
SFPT iha área formasaun hamutuk 14, mak hanesan konstrusaun jerál, alvenaria, karpintaria, kanalizasaun, eletrisidade, soldadura, painél solar, indústria marítimu no portu, ospitalidade, agrikultura, operasaun no manutensaun bomba bee elétrika, eletrisidade no instrumentasaun oleo no gas, biomasa biogás, lideransa no jestaun de projetu.
Enkuantu SFPT iha planu ba rekrutamentu iha tinan 2022 ne’e sei simu estudante foun hamutuk 400, no formandu ativu iha SFPT Hamutuk 136.
Fonte: Timor News