Dili, 15 Jullu 2021 – Implementasaun Serka Sanitária (SS) halo karau ne’ebé Grupu Haburas Foho-Ailiku hakiak labele lori ba matadouru nune’e mós produtu agríkola sira hanesan modo-tahan dodok hotu no batar mós fuhuk hotu tanba susar atu transporta ba merkadu.
Grupu Haburas Foho-Ailiku ho membru hamutuk foinsa’e na’in-37 ne’ebé lokaliza iha suku Foho-Ailiku, postu-administrativu Hatu-Udu, Ainaru, nia Koordenadór Juvinal da Costa hateten katak, sira sente triste tanba sira-nia rezultadu produtu la folin.
“Hanesan povu kiak sente triste tanba ho ami nia esforsu ba halo to’os no ikus mai buat sira ne’e la folin,” nia relata ba jornalista Timor News ohin (15/7) via telemóvel.
Nune’e Juvinal ezije ba Governu atu kria merkadu ne’ebé di’ak ba to’os-na’in sira-nia produtu iha situasaun saida de’it ho folin sustentável duni ba sira-nia nesesidade.
“Ami mak imi-nia povu, hakarak ka lakohi ami nia susar ho terus ne’ebé ami iha ami hato’o ba imi (Governu),” nia akresenta.
Fonte: Timor News