Kovalima, 01 Juñu 2022 - Minístru Administrasaun Estatal (MAE), Miguel Perreira de Carvalho, hateten katak benefisiáriu uma ka'in 323.426 iha Timor-Leste, sei hetan subsídiu tinan ikus kada uma kain ho valór $200 hosi Governu iha fulan Novembru tinan ida ne'e, maibé sei la aplika ba família foun. Miguel hateten lia hirak ne’e iha reuniaun datoluk ho administradór munisipál no prezidente autoridade munisipál hosi munisípiu 13, no diretór jerál sira iha salaun enkontru administrasaun munisípiu Covalima iha kuarta-feira (01/06) ohin.
Miguel hatutan tan katak governu daualu konstitusionál prevé ona orsamentu Dóllar Amérikanu milloins 70 hodi fo subsídiu tinan ikus ba populasaun uma kain 323.426 iha munisípiu 13 no RAEOA. Pagamentu subsídiu tinan ikus kada uma kain ne'e bazeia de'it ba dadus fíxa família ba programa sesta bázika nian no sei la iha rejistu foun ba fíxa família foun.
Miguel apéla ba administradór munisipál no prezidente autoridade munisipál sira, hodi orienta administradór postu sira hodi fahe informasaun ba lideransa komunitária sira, atu labele autoriza hodi fahe fíxa família foun ba komunidade sira hodi prevene problema iha prosesu pagamentu subsídiu tinan ikus kada uma kain nian.
Fonte: Diáriu "Roman ba Sosiedade" Manufahi