SUBSÍDIU: KADA ESTUDANTE SEI HETAN PULSA $10 NO OSAN PROPINAS DURANTE SS
Dili, 13 Maiu 2021 – Governu liuhosi Ministériu Ensinu Superiór, Siénsia no Kultura (MESSK) sei fó apoiu subsídiu ba estudante universitáriu sira hodi selu propinas inklui fahe mós pulsa $10 hodi tuir aula aprendizajen online durante implementasaun Serka Sanitária (SS).
“Governu, liuhosi Ministériu Ensinu Superiór, Siénsia no Kultura (MESSK), atu apoiu subsídiu ba estudante sira liuhosi selu propinas no pulsa ba estudante hotu ne’ebé ativu hela,” dehan Vise Reitór ba Asuntu Akadémiku no Garantia Kualidade (VRAAGK) Universidade Nasionál Timor Lorosa’e (UNTL) Samuel de Sousa Freitas, tuir informasaun ne'ebé divulga ohin (13/5).
Tanba ne’e, Samuel dehan katak nia Gabinete prepara hela dadus estudante UNTL sira ne’ebé atu hetan subsídiu refere.
“Subsídiu sei fó mak tuir estudante ida-idak nia kustu pagamentu nian, hanesan sira ne’ebé ativu hela aula $30.00 no sira ne’ebé livre teoria sei fó $5.00 ne’e ba propinas nian, no pulsa ba telefone hodi uza ba internet $10 kada estudante ida-idak,” VRAAGK akresenta.
Enkuantu Diretór Nasionál Atendimentu Estudante (DNAE) Rui Loco Pires informa katak dadus ne’ebé sira entrega ona ba Gabinete VRAAGK kompleta ho númeru telemóvel hamutuk na’in-19.425.
“Sei falta estudante na’in-8.138 mak presiza ita kompleta no atualiza númeru kontaktu ativu hodi entrega ba MESSK,” dehan DNAE Rui.
Fonte: Mídia Universidade Nacional Timor Lorosa'e (UNTL)
