Vikeke, 10 Agostu 2021 – Xefe Suku Liaruka, postu-administrativu Ossú, munisípiu Vikeke, Filomeno Soares informa katak suku Liaruka ne’ebé kompostu hosi aldeia hamutuk lima ho populasaun hamutuk 1.923 to’o agora halerik hela ba liña elestrisidade no estrada.

“Ami-nia aldeia lima ne’e seidauk asesu ba liña eletrisidade no estrada. (Ida ne’e) difikulta ami no ami-nia oan sira, nakukun atu estuda la di’ak, no ami-nia movimentu hanesan ba merkadu ne’e labele tanba tempu udan estrada aat,” Xefe suku Liaruka informa ba jornalista Timor News ohin (10/8) via telefone.

Filomeno akresenta katak, durante ne’e populasaun sira iha suku refere sunu de’it mina-rai hodi fasilita sira atu hala’o atividade iha tempu kalan.

Kona-ba estrada, nia dehan katak, difikulta mós pesoál saúde sira atu halo viajen ba fatin ruma hodi atende pasiente.

Tanba ne’e, Xefe suku Filomeno husu ba Governu atu labele ko’alia polítika ba sira-nia an de’it, maibé presiza haree mós komunidade nia moris iha área rurál sira.

“Governante sira labele ko’alia polítika ba sira nian de’it. Haree mós povu ne’ebé mak iha área remota, tau-matan karik ba hotu-hotu la’os ba balu de’it,” dehan Filomeno.