Tailándia, 13 Jullu 2021 – Tailándia sei kahur ka mistura vasina tipu Sinovac ho vasina tipu AstraZeneca iha sira-nia programa vasinasaun tanba profisionál saúde no médiku atus resin nafatin infetadu Covid-19 maske simu ona vasina Sinovac doze rua, haktuir BBC (12/7/2021).
Nune’e, ema sei simu vasina tipu Sinovac iha doze dahuluk no sei simu fali vasina tipu AstraZeneca ba doze daruak nian.
Kompas.com mós haktuir, “Tailándia mós sei fó vasina doze datoluk nu’udar faze booster ba ema ne’ebé simu ona vasina Sinovac doze daruak”.
Doze datoluk ne’e bele simu ho tipu vasina AstraZeneca ka vasina seluk hanesan Pfize-BioNTech tuir BBC informa.
Iha domingu (11/7) liubá Ministériu Saúde Tailándia informa katak, profisionál saúde besik 677.000 iha Tailándia ne’ebé simu ona vasina kompletu ho tipu Sinovac, maibé entre fulan Abríl to’o Jullu ne’e sira na’in-618 mak nafatin infetadu Covid-19 no na’in-1 mate.
Fonte: BBC News