Afeganistaun, 13 Setembru 2021 – Grupu Taliban ne’ebé oras ne’e domina no governa hikas Afeganistaun, hasai regulamentu ida ba universidade hotu-hotu iha Afeganistaun katak bandu estudante feto sira atu estuda ka hala’o aprendizajen hamutuk ho estudante mane sira iha sala aula laran ida de’it.
Nune’e, Ministériu Ensinu Superiór Afeganistaun sei haketak estudante ho sexu feto hosi estudante ho sexu mane ba sala aula keta-ketak.
Ministru Ensinu Superiór Afeganistaun Abdul Baqi Haqqani afirma liuhosi konferénsia imprensa ne’ebé hala’o iha domingu (12/9) ne’e iha Afeganistaun katak, Governu ne’ebé Taliban forma ne’e sei implementa regra refere ba feto hotu-hotu iha ensinu superiór públiku no privadu sira, no sei halo mós revizaun ba kuríkulu.
“Ami sei la permite mane no feto estuda hamutuk. Ami sei la permite implementasaun estuda hamutuk entre feto no mane,” dehan Haqqani iha domingu ne’e, haktuir CNN.
Nia dehan katak edifísiu eskola sira sufisiente atu haketak estudante feto no mane. Kona-ba dosente, Ministru ne’e dehan, dosente feto mak sei hanorin estudante feto sira no dosente mane mak sei hanorin estudante mane sira. Wainhira dosente feto la sufisiente, Governu sei buka alternativu balu.
La’os ida ne’e de’it, Governu ne’ebé forma hosi grupu Taliban ne’e mós obriga estudante feto sira tenke hatais nu’udar ema musulmanu duni.
Taliban mós hasai regra foun ida seluk tán katak feto sira labele asume kargu Ministra tanba feto sira-nia funsaun mak túr-ahi de’it.
Dezde grupu Taliban asalta no domina Afeganistaun iha 15 Agostu 2021 liubá, sira hasai ona regulamentu barak ne’ebé limita feto sira hosi liberdade balu inklui kampu traballu.
Fonte: CNN International