Dili, 22 Novembru 2021 – Governu Timor-Leste asina akordu subvensaun millaun $5 hosi Ajénsia Kooperasaun Internasionál Korea (sigla inglés, KOICA) hodi uza atu suporta Governu nia esforsu sira atu dezenvolve Sistema arkivu dijitál iha Centro Nacional Chega! (CNC), dezenvolve kualidade istória no edukasaun harii dame, haforsa kapasidade no servisu parseria ba rekonsiliasaun konflitu no harii dame.
“Daudaun ne’e Governu inisia ona instalasaun kabu submariñu liga Darwin mai Díli, Dijitalizasaun Chega! sei iha potensialidade atu realiza mandatu morál ba ita-nia nasaun no demostra kompromisu boot ba dame no rekonsiliasaun, respeitu ba direitu umanu no dignidade umanu, la’ós de’it iha rai-laran maibé mós iha rejiaun no globál,” Ministru Finansa Rui Agusto Gomes informa, hafoin asina tiha akordu ne’e, haktuir Ministériu Finansa nia divulgasaun ohin (22/11).
Enkuantu Embaixadór Korea iha Timor-Leste, Jeong Ho Kim hateten, “Koreia no Timor-Leste, ita iha esperiénsia istóriku ne’ebé hanesan hosi tempu okupasaun ba independénsia iha ita-nia tempu modernu. Atu rekupera estragus no kanek sira kauza hosi tempu konflitu, Ita presiza atu hanoin no aprende hosi istória violasaun direitu umanu no justisa”.
Fonte: Ministério das Finanças (MF)