Dili, 18 Novembru 2020 – Asosiasaun Emprezariál Feto Timor-Leste (sigla portugés AEMTL) halo lansamentu ba komboiu dahuluk iha Timor-Leste sein trilla (inglés, trackless train), atu fasilita turista sira hodi halo vizita ba fatin turizmu iha kapitál Dili.

Prezidente interinu AEMTL Atha Sagran ba jornalista sira, hafoin halo tiha lansamentu ba komboiu ne’e, ohin (18/11), iha Kolmera, Dili, hateten katak planu atu hahú loke ka ativa komboiu ne’e hodi halo operasaun mak iha sábadu semana ne’e.

Nia haktuir tán, rota ba komboiu ne’e mak hosi Kolmera ba Kristu-Rei, Kolmera ba Tasi-tolu, Kolmera ba Palásiu Lahane, no nia sentru mak iha Kolmera. Komboiu ne’e sei la tula ema iha dalan, sé de’it bele sa’e maibé sosa billete ho folin dólar amerikanu 2, no sa’e iha nia sentru ka rota ne’ebé temi ona. Komboiu ne’e bele tula ema hamutuk 40.

Atha haktuir tán, AEMTL iha planu atu estabele komboiu refere iha munisípiu hotu-hotu, hodi atrai turista atu vizita fatin istóriku sira no hatene istória kona-ba fatin turizmu sira, tanba komboiu ne’e mós iha teknolojia atu konta istória kona-ba fatin turístiku ida wainhira nia to’o iha fatin ne’e.

Komboiu ne’e nia kustu mak dólar amerikanu rihun 40 resin, no hetan apoiu hosi USAID inklui garante nia manutensaun.