Dili, 18 Outubru 2021 – Ministru Defeza Filomeno da Paixão de Jesus, informa katak Governu planeia atu halo rekrutamentu ba membru FALINTIL Forsa Defeza Timor-Leste (F-FDTL) no Polísia Nasionál Timor-Leste (PNTL) hamutuk dala ida de’it ka ‘rekrutamentu konjuntu’.
Ministru Defeza informa asuntu ne’e hafoin hasoru malu ho Primeiru-Ministru Taur Matan Ruak, ohin (18/10) iha Faról, Dili, no esplika katak ho rekrutamentu konjuntu refere, membru foun sira bele hamutuk durante fulan ida ka rua hodi aprende valór prinsípiu komún depois mak koloka fali ba iha espesialidade.
“Iha tempu balu ne’ebé sira hamutuk bele koñese malu di’ak hodi aprende iha disiplina komún. Tinan oin rekrutamentu tenke akontese dala ida de’it nune’e sai hosi ne’ebá mak ita fahe fali balu ba Polísia no balu nafatin iha F-FDTL, nune’e disiplina ba parte rua ne’e hanesan,” Ministru informa.
Nia akresenta katak, rekrutamentu konjuntu ne’e sei akontese iha 2022 maibé konseitu hirak ne’e sei haree hela, no sei aprezenta ikus ba Konsellu Ministru iha fulan Outubru nia rohan.
Fonte: Ministério da Defesa Timor-Leste