TRABALLADÓR 71 ATU BA KOREA SÚL IHA OUTUBRU, KADA EMA IDA SEI PREPARA $4.200
Dili, 20 Setembru 2021 - Diretór Jerál Formasaun Profisionál no Empregu Paul Alves hala’o enkontru iha salaun Diresaun Nasionál Empregu Esternu (DNEE), Bekora, segunda (20/09) ne’e, ho traballadór na’in-71 ne’ebé hetan ona kontratu no atu aranka ba servisu iha Korea Súl iha 22 Outubru 2021, hodi esplika ba traballadór hirak ne’e katak, sira kada ema ida presiza prepara osan hamutuk $4.200.
Nia esplika katak sira tenke prepara montante osan refere tanba kritéria haruka traballadór ba servisu iha Korea Súl uluk ho agora la hanesan. Agora molok traballadór aranka ba Korea Súl sei halo kuarentena iha Timor-Leste durante loron 14, no sira sei selu kada ema ida dólar $50 ba loron ida. Wainhira ba to’o iha Korea Súl sei hala’o tán kuarentena durante loron 14 no sira sei selu rasik. Kuandu pozitivu Covid-19 iha ne'ebá, nia sei selu izolamentu ho folin $1.500, tanba ne’e kada ema ida sei prepara $4.200.
Diretór Jerál ne’e klarifika, kritéria foun ne’ebé Governu Korea Súl fó mak halo traballadór sira tenke prepara osan ne’ebé ho montante boot, tanba ne’e realiza enkontru refere hodi esplika ba sira atu labele hamosu dúvida relasiona ho orsamentu ne’ebé hatama.
Traballadór na’in-71 ne’ebé prepara atu aranka ba Korea Súl iha 22 Outubru ne’e kompostu hosi regulár na’in-50 no re-entry na’in-21, maibé sei hein teste PCR Covid-19 no mós teste ba moras sira seluk, nune’e karik traballadór balu afeta moras entaun sei labele aranka ba Korea Súl.
Fonte: Secretário Estado para Formação Profisional e Emprego (SEFOPE)
