Dili, 17 Novembru 2021 – Traballadór servisu saneamentu husu ba komunidade sira atu fakar fo’er ho loloos iha fatin soe fo’er ka lixeiru ne’ebé Governu estabelese ona atu nune’e animál labele dada tún-sa’e fo’er sira, transporte nia movimentu mós labele dada fo’er ba estrada laran, no kontinua mantéin ambiente saudável.
“Ita labele halo ambiente fo’er selae nasaun seluk bele hateten ita, ne’ebé ha’u sempre aviza beibeik, kuandu fakar fo’er (iha lixeiru) ne’e labele fakar mai to’o estrada. Imi fakar to’o estrada laran entaun kareta halai ba-mai fo’er bele namkari hotu, sai ba li’ur hotu. Ne’ebé labele soe fo’er arbiru, labele fakar arbiru, tenke fakar iha fatin ne’ebé ema hadi’a ba ita,” traballadór servisu saneamentu, Manuel da Costa de Jesus informa ba jornalista Timor News, ohin (17/11) iha Vila-Verde, Dili.
Nia dehan katak dala-barak komunidade sira nunka halo ida ne’e no fó hanoin mós la rona, tanba ne’e presiza Governu tenke eduka komunidade sira atu hatene estima ambiente.
Fonte: Timor News