Dili, 26 Novembru 2021 – Sekretaria Estadu ba Formasaun Profisionál no Empregu (SEFOPE), liuhosi Diresaun Nasionál Empregu Esteriór, ohin (26/11), haruka tán ona traballadór timoroan hamutuk na’in-21 ba servisu iha Korea Súl iha área peska.
Iha entrevista, Diretór Diresaun Nasionál Empregu Esteriór Filomeno Soares hateten, “ohin Governu Timor-Leste liuhosi Sekretaria Estadu ba Formasaun Profisionál no Empregu marka tán istória ida, hodi haruka traballadór timoroan na’in-21 ba servisu iha Korea Súl, ba dala tolu iha tempu (pandemia) Covid-19”.
Diretór ne’e esplika, ohin traballadór aranka hosi Timor-Lerste ho aviaun Air Timor, sei tún (transit) iha Kuala Lumpur, Malázia, no iha 27 Novembru 2021 mak tama iha Korea Súl, no sei halo kuarentena durante loron sanulu tuir kritéria ne’ebé Governu Korea Súl fó.
Diretór ne’e mós hato’o ninia mensajen ba traballadór sira katak, kuidadu nafatin saúde, servisu labele sees hosi sistema, nune’e hetan osan fila mai bele dezenvolve ekonomia família no nasaun nian.
Fonte: Secretário Estado para Formação Profisional e Emprego (SEFOPE)