Ukránia, 28 Fevereiru 2022 – Komisáriu ba Direitu Umanu Ukránia relata katak, to’o iha domingu (27/2) ne’e, Ukránia lakon ona nia ema sivíl hamutuk na’in-210 kauza hosi invazaun ne’ebé Rúsia halo hahú hosi 24 Fevereiru 2022, haktuir BBC News.
Númeru vítima mate refere inklui mós labarik na’in-16. BBC News divulga katak labarik feto ida naran Alisa Hlans ho idade tinan hitu (7) mate iha jardín labarik nian wainhira jardín ne’e hetan bomba hosi Rúsia iha loron daruak invazaun. Iha mós membru komunidade étnika grega Ukránia na’in-10 mak mate wainhira sira-nia aldeia hetan atake iha parte súl.
‘Ami presiza páz,” deklara doutór sira iha Ukránia ne’ebé tau-matan ba ema sira ho kanek todan.
Iha 24 Fevereiru 2022 liubá Prezidente Rúsia Vladimir Putin deklara ofisialmente Rúsia nia operasaun militár ba Ukránia no hafoin hato’o tiha deklarasaun, militár Rúsia lansa kedas atake ba Ukránia.
Putin mós ameasa parte seluk atu labele envolve iha funu ne’ebé Rúsia halo.
“Sé de’it mak koko interrompe no envolve iha ami-nia asuntu, no to’o kria ameasa ba ami-nia nasaun no povu, tenke hatene katak Rúsia nia resposta sei to’o lalais no fó konsekuénsia ne’ebé imi seidauk hasoru iha imi-nia istória,” dehan Putin.
Rúsia nia asaun agresiva ne’e hahú mosu hafoin iha indikasaun katak North Atlantic Treaty Organization (NATO) nia expansaun to’o iha Europa parte leste, no Ukránia atu adere ba NATO.
Hafoin haree katak seidauk hetan ajuda hosi nasaun ka parte ruma hodi hapara funu ne’e, Prezidente Ukránia Volodymyr Zelenskyy deside uza uniforme militár nian hodi defende Ukránia iha liña frente, no nia mós husu populasaun mane sira ho idade 18-60 atu ba kaer arma hodi luta kontra Rúsia.
Fonte: BBC News