Manufahi, 16 Setembru 2021: Uma-kain vulnerável 9 iha aldeia Uma-Luli, suku Babulu, Same, enfrenta problema menus ai-hán tanba kauza hosi pandemia Covid-19.
Problema refere relata hosi ekipa Centro Foinsa’e Dom Boaventura Manufahi (CEFOBOM) hafoin servisu hamutuk ho Caritas Austrália in Timor-Leste (CATL) no Autralian Aid hodi halo identifikasaun iha kinta (16/9) ne’e iha Babulu.
CEFOBOM mós relata katak uma-kain 9 ne’e enfrenta mós problema bee-moos ne’ebé nesesáriu tebes ba ema nia moris.
Iha atividade ne’e, ekipa identifika inan-faluk ida ho naran Verónica Corte-Real ne’ebé hela iha kondisaun la dignu. Verónica haktuir ba ekipa katak nia ho nia oan na’in-2 hela de’it iha uma ida ne’ebé didin ho hadak ho kondisaun aat, hafoin nia la’en abandona tiha nia.
Verónica informa mós katak durante pandemia Covid-19 difikulta nia atu asesu ba merkadu hodi fa’an produtu lokál atu sosa foos ba nesesidade família uma laran.
Aléin hosi Verónica, ekipa mós identifika idozu ida ho naran Marcelino Tilman ne’ebé sofre hela moras stroke no toba de’it iha uma. Marcelino nia feen informa katak durante pandemia sira susar atu hetan ai-hán.
Fonte: Diáriu "Roman ba Sosiedade" Manufahi