Dili, 15 Juñu 2021 – Programa Nasaun Unidu ba Dezenvolvimentu (sigla inglés UNDP) entrega apoiu ekipamentu kámera Drone ho marka Mavic Pro 2 hamutuk neen (6) ba Sekretaria Estadu Protesaun Sivíl (SEPS).
Xefe UNDP Munkhtuya Altangerel hateten, ekipamentu refere sei tulun servisu protesaun sivíl nian hodi halo kontrolu ne’ebé foka liu ba rezilénsia oinsá rekolla dadus iha área risku dezastre naturál.
“Ohin loron ami entrega ekipamentu Drone 6 ho espesifikasaun kompleta ho nia asesores teknolojia moderna, hodi fasilita protesaun sivíl halo levantamentu dadus no halo mapeamentu ba área sira ne’ebé risku dezastre,” dehan Altangerel ohin (15/6) iha Kaikoli, Dili, hafoin entrega tiha ekipamentu ne’e ba SEPS.
Líder máximu SEPS Joaquim Gusmão agradese ba apoiu ne’ebé UNDP oferese hodi bele fasilita Governu halo estudu identifikasaun ba risku dezastre.
“Ho ekipamentu hirak ne’e hatudu katak parseria dezenvolvimentu nia apoiu ba kestaun risku dezastre naturál maka’as tebes,” dehan Joaquim Gusmão.
Fonte: Mídia Serviço Relações Públicas de Ministério do Interior