Manufahi, 27 Marsu 2022 – Uniaun Nasionál Juventude Maubere (UNIJMA)/Ativista Pró-RDTL, hamutuk ho autoridade munisípiu Manufahi, ohin (27/3), halo kolleta ba batar éktare 12 iha aldeia Raimera, suku Babulu, postu-administrativu Same, Manufahi.

Prezidente Organizasaun Populár Traballadór Timor-Leste (OPTT), Ivo de Jesus Sequeira, hateten, atividade halo to’os ne’e ho objetivu atu kombate hamlaha no asegura seguransa ai-hán iha rai-laran, liuhosi halo to’os, natar no hakiak animál, hanesan daudauk ne’e UNIJMA realiza hela, tanba ekonómikamente Timor-Leste sei dependente ba nasaun seluk.

Administradór Arantes Isaac Sarmento, iha atividade kolleta ne’e hateten, “hanesan servidór Manufahi apresia no agradese ba UNIJMA, ajuda Estadu no Governu hodi dezenvolve área agrikultura iha Manufahi, ne’e pozitivu tebes atu hasa’e produsaun agríkola iha rai-laran”.

Nia akresenta katak parte Governu lokál iha munisípiu refere prontu apoia atividade kooperativa ne’ebé hala’o hosi movimentu UNIJMA, aproveita rai potensiál sira iha Manufahi hodi garante sustentabilidade seguransa ai-hán iha Timor-Leste.