Dili, 15 Setembru 2021 – Universidade Nasionál Timor Lorosa’e (UNTL) reativa hikas atividade prezensiál sira inklui aula prezensiál iha kampus hotu-hotu UNTL nian hahú ohin (15/9).
Desizaun ida ne’e Reitór UNTL João Soares Martins informa ba komunidade akadémika tomak UNTL nian liuhosi komunikadu ofisiál ida hafoin hetan tiha rekomendasaun hosi Ministériu Saúde.
“UNTL retoma atividade letiva prezensiál sira iha kampus hotu-hotu, hahú hosi 15 Setembru 2021,” Reitór UNTL dehan iha komunikadu ne’e.
Reitór mós husu atu komunidade akadémika hotu-hotu kontinua kumpri regra prevensaun Covid-19 sira hanesan uza máskara, mantéin distánsia sosiál metru ida ho ema seluk no regra seluk tán.
Ba estudante no dosente ne’ebé seidauk simu vasina, Reitór husu atu sira kontinua aula online. Tanba ne’e nia husu atu komunidade akadémika hotu-hotu tenke promove partisipasaun iha programa vasinasaun.
Fonte: Mídia Universidade Nacional Timor Lorosa'e (UNTL)