Dili, 12 Jullu 2021 – Universidade Nasionál Timor Lorosa’e (UNTL) daudauk ne’e prepara hela ba graduasaun prezensiál iha fulan Agostu 2021 nu’udar data tentativa ba finalista hamutuk na’in-382 ne’ebé iha tinan kotuk rejista tiha ona atu hodi tuir graduasaun maibé la konsege partisipa iha graduasaun online iha fulan Maiu liubá.
“Preparasaun ba graduasaun ne’e fahe ba rua, ida graduasaun online bazeia ba situasaun Covid-19 ne’ebé realiza ona iha 25 Maiu liubá, ho totál estudante (finalista) na’in-251, no rua mak (graduasaun) prezensiál tuir data tentativa iha fulan Agostu 2021 ho estudante (finalista) na’in-382,” dehan Diretór Diresaun Nasionál Atendimentu Estudante (DNAE) Rui Loco Pires, ohin (12/7), iha kampus sentrál UNTL, Dili.
Nia esplika katak finalista ne’ebé rejista iha 2020 nian hamutuk na’in-633 maibé liuhosi graduasaun online partisipa de’it graduadu hamutuk na’in-251, tanba ne’e mak ba sira ne’ebé seidauk gradua ne’e sei partisipa iha graduasaun prezensiál ida ne’e.
Fonte: Mídia Universidade Nacional Timor Lorosa'e (UNTL)