Dili, 14 Dezembru 2021 – Xefe Departamentu Asuntu Graduasaun, Universidade Nasionál Timor Lorosa’e (UNTL), Lino da Costa informa katak, UNTL sei realiza serimónia graduasaun ba dala-XXV ba kandidatu graduadu hamutuk na’in-642 iha 28 Dezembru 2021 tuir kalendáriu akadémiku ne’ebé determina ona, enkuantu misa agradesimentu sei realiza iha 17 Dezembru 2021.
“Misa agradesimentu ba graduadu graduasaun ba dala-XXV ninian sei hala’o iha 17 Dezembru 2021 iha igreja Sagrado Coração de Jesus, Bekora, Dili. Ami husu ba família ka inan-aman graduadu sira atu bele partisipa iha misa agradesimentu ne’e. […] Graduasaun tuir ami-nia kalendáriu akadémiku ne’ebé mak determina ona katak serimónia graduasaun ne’e sei realiza iha 28 Dezembru, ne’e data fixu. Karik iha mudansa ruma ba nia oráriu ne’e Reitór mak sei determina karik iha mudansa ba data graduasaun ninian,” Lino da Costa informa ba jornalista Timor News, ohin (14/12) iha nia knaar-fatin UNTL sentrál, Dili.
Kona-ba fatin ba serimónia graduasaun, nia hateten katak iha posibilidade atu realiza iha Centro Convenções de Dili (CCD), Merkadu-Lama, Dili, no la’os iha kampus UNTL Hera.
Enkuantu kandidatu graduadu hamutuk na’in-642 ne’e kompostu hosi nível Baxarelatu no Lisensiatura.
Fonte: Timor News