Dili, 25 Agostu 2021 – Reitór Universidade Nasionál Timor Lorosa’e (UNTL) hato’o ba komunidade akadémika tomak UNTL nian katak UNTL suspende aula no atividade prezensiál hotu-hotu hahú hosi 26 Agostu 2021, no adia mós serimónia graduasaun ba dala-XXIV ne’ebé tuir loloos atu hala’o iha 27 Agostu 2021.
Desizaun ida ne’e UNTL foti bazeia ba rekomendasaun hosi Ministériu Saúde tanba haree ba propagasaun Covid-19.
“UNTL suspende atividade ensinu no aprendizajen hotu-hotu iha rejime prezensiál hahú hosi oras tuku 00:00 loron 26 Agostu 2021. [...] Adia Serimónia Graduasaun ba dala-XXIV ne’ebé atu hala’o iha 27 Agostu 2021,” Reitór informa liuhosi despaxu ne’ebé Timor News asesu ohin (25/8).
Reitór hateten, desizaun atu reativa aula prezensiál no realiza fali serimónia graduasaun ne’e sei rona hikas hosi Ministériu Ensinu Superiór, Siénsia no Kultura.
Fonte: Mídia Universidade Nacional Timor Lorosa'e (UNTL)