UPF DETEIN JOVEN 2 HATAMA ATRIBUTU ARTE MARSIÁL ILEGÁL LIUHOSI FRONTEIRA MOTA MASIN
Kovalima, 16 Dezembru 2021 – Komandante Unidade Patrullamentu Fronteira (UPF), Superientendente Polísia Euclides Belo, ohin (16/12) afirma katak, segundu komandante kompañia Bravo Suai, Servisu Sekreta UPF, iha kuarta (15/12) ne’e, detein joven na’in-2 hatama atributu ilegál grupu arte marsiál, Ikatan Keluarga Silat Putera Timor-Leste (IKS-PTL), liuhosi fronteira Mota Masin no detein iha ponte Tafara aldeia Tabolo, postu-administrativu Tilomar, munisípiu Kovalima.
“Atu informa de’it ami nia membru UPF halo operasaun ne’ebé lidera hosi segundu komandante kompañia hamutuk ho Servisu Sekreta UPF nian, prende karreta tipu Mocrolete ida ho númeru matríkula 37.161 no detein joven mane na’in-2 ho Inisiál TDC, tinan 37 hosi Salele-Wetaba, suku Beiseuk, postu Tilomar ne’ebé hatama mina-rai litru 350. Enkuantu ida seluk nu’udar treinadór grupu arte marsiál iha ranting Gorotu-Same ho naran inisiál AS, tinan 32 hosi aldeia Puscam, suku Gorotu postu-administrativu Same, ne’ebé na’in ba atributu IKS-PTL nian,” Euclides informa via telefone ba SRP.
Euclides Belo afirma tan katak, hafoin halo identifikasaun na’in ba atributu hirak ne’e deklara katak atributu hirak ne’e tama hosi Timor Osidentál liuhosi fronteira Tasi iha loron 14 dezembru 2021, oras 01:00 kalan iha área Mota Masin nian ne’ebé fasilita hosi timoroan ida ho naran inisiál ESA, tinan 30 hela iha Salele Bot, Suku Lalawa, postu-administrativu Tilomar munisípiu Kovalima.
Enkuantu sasán hirak ne’ebé prende mak hanesan, mina-rai litru 350, atributu grupu arte marsiál IKS nian mak hanesan, farda treinu pár 82, kamizola IKS 21, poster IKS 74, envelope logo IKS 74, Kalung Q 42, masimidar pengesahan ho logo IKS 78, sertifikadu IKS 1, livru IKS 1 no poster.
Fonte: Mídia Serviço Relações Públicas de Ministério do Interior
