UPF IDENTIFIKA ATIVIDADE TRANZASAUN ILEGÁL IHA ÁREA FRONTEIRA TIMOR-LESTE NO INDONÉZIA
Bobonaru, 17 Novembru 2021 – Komandante Unidade Patrullamentu Fronteira (UPF), Superintendente Euclides Belo, deklara katak UPF halo patrullamentu rutina, iha kuarta (17/11) ne’e, no konsege identifika atividade komérsiu ilegál iha área fronteira Indonézia no Timor-Leste, no prende sasán ilegál sira.
“Loos duni hori-sehik Komandante UPF Postu Alto Lebos, Primeiru Sarjentu Adelino Maumali, hamutuk ho membru na’in-3 hala'o patrullamentu la'o ain ba área Mapelai suku Lebos, konsege identifika atividade tranzasaun ilegál no prende sasán ilegál sira,” dehan Komandante Euclides Belo, iha kuartél UPF, Nuu-Badak Batugade, Bobonaru.
Sasán ilegál hirak ne’e mak hanesan sigaru marka surya 12 pakote 373, tabaku sek marka pohon sagu kaixa 10, tabaku sek marka matahari kaixa 1, fugetis shoot 8 pakote 10, no shoot 5 pakote 20.
Atu transporta objetu ilegál hirak ne’e ba postu UPF, Euclides hateten katak, nia membru hetan apoiu hosi FALINTIL Forsa Defeza Timor-Leste (F-FDTL) hodi lalin objetu sira ne'e ba postu UPF ho distánsia ne'ebé dook no daudauk ne’e entrega ona sasán hirak ne’e ba komandu PNTL munisípiu Bobonaru hodi halo prosesu investigasaun.
Fonte: Mídia Serviço Relações Públicas de Ministério do Interior
