Dili, 02 Dezembru 2021 – Variante foun ho naran Omicron ne’ebé relata dahuluk iha 24 Novembru 2021 iha Áfrika Súl, oras ne’e deteta ona iha nasaun hamutuk 25 inklui Timor-Leste nia nasaun viziñu Austrália, haktuir CNN International ohin (02/12).

“Austrália: kazu 7, Áustria: kazu 1, Béljika: kazu 1, Botswana: kazu 19, Brazil: kazu 2, Kanadá: kazu 2, Repúblika Seka: kazu 1, Dinamarka: kazu 4, Fransa: kazu 1, Alemaña: kazu 9, Hong Kong (Xina): kazu 4, Izrael: kazu 4, Itália: kazu 9, Japaun: kazu 2, Olanda: kazu 16, Nijéria: kazu 3, Noruega: kazu 2, Portugál: kazu 13, Arábia Saudita: kazu 1, Áfrika Súl: kazu 77, España: kazu 2, Suésia: kazu 3, Reinu Unidu: kazu 22,” CNN relata nasaun hamutuk 23.

Maibé, ohin Estadus Unidus Amérika (EUA) foin relata ninia kazu foun variante Omicron 1, nune’e mós Korea Súl relata ninia kazu variante Omicron 5, tanba ne’e totál nasaun hamutuk 25 mak infetadu Omicron.

Hafoin relata ba dahuluk iha 24 Novembru, Organizasaun Mundiál ba Saúde (OMS), iha 26 Novembru, deklara kedas katak Omicron nu’udar ‘Variant of Concern’, no nia da’et lalais tebes.

EUA ninia Sentru Prevensaun no Kontrolu Moras (sigla inglés CDC) hato’o rekomendasaun katak ema adultu sira presiza simu vasina kontra Covid-19 doze datoluk ka bolu ‘booter’ atu prevene transmisaun Omicron.

Nasaun balu hanesan Reinu Unidu, Izrael hahú daudauk ona aplikasaun vasina datoluk ne’e.

“Intervalu mínimu ba vasina booster tenke redúz tiha ninia métade, katak hosi fulan neen ba fulan tolu,” Ministru Saúde Reinu Unidu Sajid Javid hateten iha segunda (29/11) liubá, haktuir BBC News.