VASINA DOZE DAHULUK IHA MUNISÍPIU BALU ATINJE ONA 86%, IHA ERMERA 52%
Dili, 25 Outubru 2021 – Rezultadu persentajen provizóriu hosi ema ne’ebé simu ona vasina kontra Covid-19 pelumenus doze dahuluk iha munisípiu Kovalima no Vikeke atinje ona 86% nu’udar munisípiu ne’ebé ninia populasaun ho idade tinan 18 ba leten maioria simu ona vasina doze dahuluk, enkuantu Ermera nu’udar munisípiu ne’ebé persentajen populasaun ho idade tinan 18 ba leten simu ona vasina doze dahuluk ki’ik liu mak 52%.
“52% populasaun ho tinan 18 ba leten iha Ermera simu ona pelumenus doze dahuluk vasina Covid-19,” Governu relata ohin (25/10).
Maske Primeiru-Ministru Taur Matan Ruak iha semana rua liubá tún direita hodi ba halo kampaña vasinasaun iha munisípiu Ermera maibé oras ne’e seidauk hatudu rezultadu persentajen hosi aplikasaun vasina doze dahuluk ne’ebé boot ho lalais iha Ermera.
Hafoin Ermera, persentajen aplikasaun vasina kontra Covid-19 doze dahuluk ne’ebé ki’ik liu tuir kedas mak Ainaru ho 53%, no Likisá ho Bobonaru 56%.
Fonte: Mídia Ministério Presidénsia do Conselho Ministro
