Manufahi, 01 Dezembru 2021 – Diretór Planeamentu Polítika no Koperasaun Ministériu Saúde, Narciso Fernandes relata katak, kazu foun HIV-SIDA ne’ebé Timor-Leste rejista iha tinan 2021 hamutuk ema na’in-192 mak infetadu, tanba kauza hosi atividade prostituisaun ne’ebé hahú buras.

Narciso hato’o asuntu ne’e, ohin (01/12), wainhira reprezenta Ministra Saúde hodi ba komemora loron mundiál HIV-SIDA iha postu-administrativu Fatuberliu, munisípiu Manufahi, ho tema, ‘Timor-Leste livre hosi estígma no diskriminisaun ba ema ho vírus HIV-SIDA, ita hotu responsabilidade, ita hotu nia lian’.

Nia akresenta, “kazu HIV-SIDA sai preokupasaun mundu nian inklui Timor-Leste, no iha Timor-Leste hosi tinan 2003 to’o tinan 2021 totál kazu hamutuk 1.464, hamate ona sidadaun timoroan na’in-234, no pasiente na’in-719 agora daudauk kontinua simu ai-moruk antiretroviral”.

Narciso dehan, situasaun ne’e mosu tanba Joventude no komunidade sira sei menus informasaun kona ba vírus HIV-SIDA.
Iha fatin hanesan, Sekretáriu Ezekutivu Komisaun Nasionál Kombate HIV-SIDA Timor-Leste (sigla portugés, CNCS-TL), Atanasio de Jesus informa katak, Timor-Leste halo kooperasaun ho parseiru sira hodi hala’o meiu oioin atu prevene HIV-SIDA, maibé to’o ohin loron vírus ne’e aumenta kada loron iha nasaun ne’e.

Tuir nia, fatór ne’ebé kontribui maka’as ba transmisaun HIV-SIDA mai hosi ransu no seksu lívre, droga, no atividade prostituisaun hahú buras, liuhosi prostituisaun online iha nasaun Timor-Leste, inklui rai-ketan Timor-Leste ho Indonézia mós kontribui maka’as ba prostituisaun tanba sidadaun sira tama-sai ilegál.

Administradór Munisípiu Manufahi Arantes Isaac Sarmento relata, sidadaun Manufahi hamutuk ema na’in-19 mak afeta ona hosi HIV-SIDA, no na’in-10 mak mate. Nune’e, nia apela ba povu Manufahi liuliu ba foinsa’e sira, labele hanoin atu halo seksu livre kuandu seidauk simu sakramentu kaben, tanba vírus ne’e perigu tebes ba ema hotu nia vida.

Administradór Manufahi ne’e agradese ba Ministériu Saúde no ezekutivu Komisaun Nasionál kombate HIV-SIDA Timor-Leste, hili munisípiu Manufahi liuliu postu-administratívu Fatuberlihu hodi realiza komemorasaun loron mundiál HIV-SIDA, nune’e bele partilla infromasaun ba komunidade sira iha área rurál hodi bele hetan informasaun no prevene-an hosi vírus ne’e.