Dili, 07 Juñu 2021 – Vise Ministru Interiór (MI) António Armindo husu ba komunidade sira atu tau nafatin konfiansa ba instituisaun Polísia Nasionál Timor-Leste (PNTL) tanba nu’udar instituisaun Estadu nian.
Nia hato’o asuntu ne’e ohin (07/6) hafoin hamutuk ho Komandante Jerál PNTL Faustino da Costa, hasoru malu ho Primeiru-Ministru no Ministru Interiór Taur Matan Ruak iha Faról, Dili, hodi relata situasaun rai-laran.
Vise Ministru ne’e mós agradese ba krítika balu ne’ebé hato’o hosi sosiedade sivíl no públiku tomak kona-ba asaun sira ne’ebé oknum PNTL balu halo la tuir lei haruka.
“Ita mós lakohi ita-nia instituisaun ne’e marka pasu hanesan ne’e de’it. Tanba ne’e presiza nafatin krítika para ita bele dezenvolve, sé la kritika ita hanoin buat hotu di’ak de’it,” dehan António Armindo.
Fonte: Mídia Serviço Relações Públicas de Ministério do Interior