Dili, 27 Jullu 2021 – Vise Primeira-Ministra ne’ebé nu’udar mós Ministra Solidariedade Sosiál no Inkluzaun (MSSI) Armanda Berta dos Santos halo sosializasaun kona-ba vasinasaun kontra Covid-19 ba komunidade iha tersa (27/7) ne’e iha suku Hera, Kristu-Rei, Dili, hodi husu ba komunidade sira atu hakbesik-an ba sentru vasinasaun sira nune’e bele simu vasina Covid-19 no labele ta’uk ka preokupa ho rumoris sira ne’ebé espalla iha mídia sosiál.

“Iha munisípiu Díli ema kuaze hamutuk rihun 90 resin mak seidauk vasina, no oinsá mak ita-nia komunidade sira atu hatene no komprende liután kona-ba vasinasaun nian, tanba ne'e mak ohin ita tún direta hodi fahe informasaun ne'ebé loos no klaru ba sira, ita haree ba situasaun ida agora variante delta foun ne'ebé mosu no liuliu iha nasaun viziñu Indonézia, ne'ebé kuaze hamate ona populasaun barak, tanba ne'e husu ba ita hotu no liuliu ba ita-nia komunidade sira atu labele preokupa ho rumoris ne'ebé fó sai iha mídia sosiál, no oinsá mak atu hasa’e ita-nia imunidade hodi kontra Covid-19 mak tenke vasina, la’os iha nasaun Timor-Leste de’it, maibé iha mundu tomak,” dehan Vise-Ministra iha sosializasaun ne’e.

Vise-Ministra akresenta, Governu preokupa ho situasaun pandemia atuál iha Timor-Leste, ne’e duni mak Governu toma ona medida hodi fó prioridade ba kombate Covid-19 ho programa kampaña vasinasaun.