Dili, 29 Marsu 2021 – Prezidente Partidu Kongresu Nasionál Rekonstrusaun Timór (sigla portugés CNRT) Kay Rala Xanana Gusmão, ohin (29/3) dadeer iha tuku 8:00 resin, marka prezensa iha Ministériu Públiku (MP), Kolmera, Dili, relasiona ho keixa kontra deputadu CNRT na’in-21 ne’ebé Sekretáriu Jerál Partidu Frente Revolucionário de Timor-Leste Independente (FRETILIN) Mari Alkatiri aprezenta ona ba Ministériu Públiku.
www.timornews.tl observa katak Xanana Gusmão nia prezensa iha MP ne’e hetan seguransa hosi membru Polísia Nasionál Timor-Leste (PNTL), no akompaña mós hosi foinsa’e militante Partidu CNRT nian balu ne’ebé uza faru ho imajen Xanana Gusmão nian no hein hela nia iha edifísiu MP nia oin.
Líder Máximu CNRT nia prezensa refere hodi presta deklarasaun iha MP hafoin deputadu CNRT 21 hetan tiha notifikasaun hosi MP kona-ba keixa ne’ebé Mari Alkatiri aprezenta.
Enkuantu keixa ne’e Marí Alkatiri aprezenta ba MP iha 06 Novembru 2020 “nu’udar sidadaun no la’os nu’udar Sekretáriu Jerál FRETILIN” tuir nia rasik deklara, no nia mós la esplika kona-ba konteúdu hosi keixa ne’e tanba konsidera nu’udar segredu justisa nian.
Fonte: Timor News