Dili, 08 Dezembru 2021 – Xefe aldeia Fomentu III Marcelina Carlos hateten katak nia laran-susar tanba kanalizasaun foun ne’ebé Governu estabelese ba ninia komunidade sira ne’e lori bee ki’ik tebes ne’ebé nia kompara katak hanesan fali ‘laho nia mii’, no halo ninia komunidade sira halerik ba bee-moos besik fulan ida ona.

“Ha’u mós laran-susar tanba komunidade hotu-hotu iha aldeia ida ne’e kuaze semana tolu ka haat ona la asesu ba bee-moos. Kanalizasaun ida uluk sei di’ak liu fali ida (agora) ne’e […] Bee-moos ne’e importante. […] Kanalizasaun ne’e hosi paralon ida boot ne’e. sira taka ida tuan ne’e no agora uza ida foun ne’e. […] Kanu ida tuan ne’e bee sai di’ak liu fali ida agora sira dada ne’e. Ida tuan ne’e di’ak liu, ne’e ami la uza sañu mós nia mai maka’as, ne’e ami bele liga de’it tama ba uma-laran. Mais agora laiha, ami tenke uza sañu entaun pulsa ami sosa gasta de’it ba bee. Pulsa atu $10 fali ka $20 mós ami uza ba bee tanba nia suli mai hanesan fali laho nia mii, entaun ami tenke uza sañu mak bele dada to’o iha uma-laran. Sé la uza sañu entaun ami tenke hadeer to’o kalan boot hanesan fali hadeer mate mak foin ense tanba ne’e nia mai boot iha tuku 1 to’o tuku 4 sira ne’e kalan. Husu ba Governu tau-matan ba tanba ida ne’e iha sidade, sidade. Sidade tiha mak ita halerik fali ba bee ne’e,” Marcelina informa ba jornalista Timor News, ohin (08/12) iha nia uma, Fomentu III, Dili.

Enkuantu iha fatin ne’ebé komunidade sira halibur malu hodi kuru bee iha aldeia refere, labarik Zeferino Soares ho idade 12 hato’o mós ninia preokupasaun katak loro-loron sira lalin beibeik bee ba te’in, hariis no seluk tán.

“Ami lalin hela de’it,” nia dehan.

Iha entrevista, komunidade balu ko’alia ho lian maka’as iha kotuk katak Governu tenke servisu ho loloos ba nesesidade povu nian.