Manufahi, 12 Dezembru 2022 - Xefe suku Aitemua, Valente Soares, husik hela ninia responsabilidade suku nian hodi ba tiha fali servisu iha Austrália la ho koñesimentu hosi komunidade no autoridade sira nível postu no munisipál. Autoridade sira foin hatene hafoin hetan informasaun kona-ba xefe suku Valente ninia viajen hosi mídia sosiál bainhira nia aranka ba Austrália iha 7 Dezembru 2022. Suku Aitemua pertense ba postu Turiskai no munisípiu Manufahi.

"Ami autoridade munisipál no postu foin hatene iha mídia sosiál katak, xefe suku ne'e aranka ona ba Austrália iha semana kotuk (07/12) [...]", dehan Arantes.

Administradór munisípiu Manufahi, Arantes Isaac, lamenta tebes ho situasaun ida ne'e tanba xefe suku nia auzénsia ne'e difikulta pagamentu subsídiu $200 tinan ikus nian ba komunidade sira tanba presija mós xefe suku ninia asinatura.

Atu rezolve asuntu ida-ne'e, Arantes orienta ona administradór postu Turiskai no halo ona enkontru estraordináriu ho konsellu suku Aitemua iha fin-de-semana foin lalais ne'e hodi halo substituisaun ba xefe suku no ninia prosesu administrativa hodi troka asinatura iha tiha ona banku BNCTL. Nune'e bainhira finaliza, pagamentu ba subsídiu bele ona hala'o.