Dili, 08 Outubru 2021 – Xefe suku Bekora Antonio da Silva Soares husu ba Governu atu ezekuta lalais planu sobu ponte Bekusi ne’ebé Primeiru-Ministru (PM) Taur Matan Ruak dehan ona iha fulan Abríl liubá tanba tempu udan mós besik ona.

“Ita-nia maun boot Primeiru-Ministru Taur Matan Ruak nia to’o iha fatin ne’ebá (ponte Bekusi), nia rencana atu prepara atu baku rahun tiha ponte ne’e para bele halo fali ponte ida ne’ebé di’ak liután. Maun Primeiru-Ministru dehan sobu. Atu sobu bele sobu maibé agora tempu udan ona. Sé agora besik udan ona, halo lalais tiha di’ak, maibé terlambat entaun populasaun sira besik ne’e araska ona,” Xefe suku Bekora informa ba jornalista Timor News, ohin (08/10), iha sede suku Bekora, Dili.

Karik Governu la konsege sobu, entaun Xefe suku husu atu Obras Públika orienta eskavatór ba para hela besik iha ponte ne’e hodi ajuda hasai fo’er sira no loke bee dalan wainhira udan boot.

“Sé bele sobu tiha entaun di’ak liu halo foun lalais tiha ba. [...] Sé la sobu entaun ha’u husu ba Obras Públika haruka traktór ba para hela iha ne’ebá para tempu udan ne’e traktór sira ajuda hasai tiha ai sira ne’e,” nia dehan.

Antonio mós konsidera katak ponte Bekusi atuál ne’ebé ho kuartu ka ku’ak neen iha okos ne’e sei kontinua impede ai no fo’er sira ne’ebé mota lori wainhira udan boot no sei nafatin fó impaktu ba komunidade sira ne’ebé hela besik iha área refere wainhira mantéin de’it ponte ne’e.