Dili, 08 Juñu 2021 – Xefe suku sira iha munisípiu Dili hasoru malu ho Primeiru-Ministru Taur Matan Ruak ohin (08/6) iha Ministériu Finansa, Dili, no relata katak komunidade sira entuziasmu tebes atu simu vasina kontra Covid-19.
Tanba ne’e, Xefe suku sira mós sujere ba Governu atu aumenta númeru pesoál saúde ne’ebé fó vasina ba komunidade sira no rezolve kartaun kinur ne’ebé la sufisiente.
Hatán ba ida ne’e, Primeiru-Ministru hateten, “sei diskute kle’an liután ho Ministériu Saúde no ekipa sala situasaun atu bele hetan mekanizmu di’ak iha programa vasinasaun ne’e nune’e bele atinje meta ne’ebé Governu define ona”.
Xefe Governu ne’e mós agradese ba Xefe suku sira-nia sakrifísiu no husu atu sira fó nafatin kontribuisaun atu sidadaun sira simu vasina barak liután.
Fonte: Mídia Gabinete do Primeiro-Ministro (GPM)