Dili, 11 Outubru 2021 – Xefe suku Vatuvou, postu-administrativu Maubara, munisípiu Likisá, Gabriela Periera da Costa Jerónimo, hato’o mensajen hodi enkoraja feto sira iha Timor-Leste katak feto la’os atu servisu de’it iha dapur maibé bele sai mós líder ida no foti desizaun.
“Ha’u-nia mensajen ba feto maluk sira katak labele ta’uk no labele grogi, ita bele mós prepara ita-nia an atu sai lideransa, la’os mane de’it mak bele foti desizaun, ita feto mós bele foti desizaun. Labele hanoin de’it katak feto ne’e nia servisu mak iha dapur de’it, maibé feto mós bele sai lideransa,” Gabriela hato’o mensajen ida ne’e, tuir Sekretaria Estadu ba Igualdade no Inkluzaun (SEII) divulga ohin (11/10).
Gabriela iha oan na’in-7 ne’ebé kompostu hosi feto na’in-6 no mane na’in-1, no nia mós asume knaar nu’udar Xefe suku Vatuvou ne’ebé eleitu ona ba períodu 2016-2023. Iha tinan 2009 nia asume knaar hanesan Koordenadora Rejistu Asuntu Veteranu durante fulan ualu.
Nível Edukasaun ikus ne’ebé Gabriela hasai mak iha Eskola Sekundária Jerál Públika Likisa ne’ebé remata iha tinan 1995.
Ho perfíl ida ne’e, SEII espera katak públiku bele hatene feto no mane hamutuk mak bele lori prosesu dezenvolvimentu iha família, aldeia, suku, no to’o ba nível nasionál.