Dili, 01 Juñu 2022 - Negosiante ambulante Ximenes, ne’ebé hanesan mós estudante, hateten ba Jornalista Timor News nian katak Rotunda Nicolau Lobato ne’e risku no la seguru ba fa’an sasan, maibé nesesidade obriga ne’ebé tenke uza duni ba buka osan hodi augenta ba selu mikrolete, fotokopia, impresaun no mós ba nesedade lorloron nian sira seluk.

“Ami hatene fatin ne’e risku liu no ladun seguru mai ami, dalaruma halo engarafamentu, [...] parte governu (guarda) sira sempre mai duni tanba fatin ne’e laos merkadu, maibé hakarak ka lakohi, ami tenki fa’an iha fatin ne’e hodi buka netik osan ba ami-nia moris,” Ximenes esplika ba jornalista Timor News iha bazar Rotunda Nicolau Lobato (31/05).

Ximenes husu ba Governu atu aranja fatin di’ak ruma ba negosiante sira iha fatin refere tanba ema sira ne’ebé mak fa’an iha ne’ebá la’os de’it husi Kampung Baru maibé mós mai hosi fatin seluk. 

Iha parte seluk Júlio Soares hateten katak nu’udar komunidade ida nia sente triste no la seguru bainhira la’o ka dalaruma uza transporte tama iha parte lorokraik iha fatin refere ne'ebé sempre mosu engarafamentu, tanba vendedór sira la fó espasu ba komunidade sira atu la’o ka la’o liu dalan. Tuir Júlio, vendedór sira ne’e tuir lolos ba fa’an iha Manleu no Taibesi, fatin ne’ebé Governu prepara tiha ona ba sira.