Dili, 10 Marsu 2022 – Kandidatu Yoon Suk-yeol hosi Partidu Pudér Povu (PPP) eleitu nu’udar Prezidente Korea Súl foun hafoin Korea Súl realiza tiha eleisaun prezidensiál iha kuarta (09/3) ne’e. Yoon sei troka Moon Jae-in ne’ebé ninia mandatu sei remata iha fulan Maiu 2022.
Enkuantu kandidatu hosi Partidu Demokrátiku (PD) Lee Jae-myung admite katak nia lakon no fó kongratulasaun ba kandidatu eleitu Yoon.
“Ha’u halo ona ho mellór maibé falla. […] Ha’u fó parabéns ba kandidatu Yoon Suk-ueol,” Lee Jae-myung dehan, haktuir Reuters media ohin (10/3).
Hosi votu válidu 98% ne’ebé sura, PPP nia kandidatu Yoon hetan votu 48,59%, enkuantu kandidatu hosi PD Lee hetan votu 47,79%.
Yoon koñesidu nu’udar figura antikorupsaun ne’ebé asume knaar nu’udar Prokuradór-Jerál iha Prezidente Moon Jae-in nia Governasaun.
Fonte: Reuters