Baukau, 9 Novembru 2022 - Vise-ministru komérsiu no indústria, Domingos Lopes Antunes, hamutuk ho Munkhtuya Altangerel - reprezentante UNDP iha Timor-Leste , no Olívio Freitas - prezidente autoridade munisípiu Baukau, halo abertura ba forum foinsa’e pra-akampamentu Kompetisaun Negósiu Inovativu III MTCI 2022, ne'ebé mak realiza iha Sentru Konvensoens Baukau, ne’ebé kobre munisípiu Baukau, Lautem, Vikeke, no Manatutu, no ho tema "Promove Diversifikasaun Ekonómia Hosi Baze".

Objetivu hosi forum foinsa'e ida-ne'e mak atu fó formasaun no fahe informasaun ba joven sira liuliu sira-ne’ebé selesiona ona hosi komisaun júri atu ba etapa finalizasaun planu negósiu nian. Forum ne’e nu’udar plataforma ida kompostu hosi entidade governu, péritu, no empreza boot sira ne’ebé iha ona esperiénsia barak hodi fahe sira-nia esperiénsia atu enkoraja foinsa'e produtivu no kriativu sira ne’ebé mai ona ho ideia negósiu inovativu ne'ebé kle'an atu sira ne’e bele kria servisu ba sira-nia-an, liuhosi fortalesimentu empreendedorizmu no ekosistema inovasaun; inklui sira-nia envolvimentu iha prosesu rekuperasaun ekonomia iha Timor-Leste hodi apoiu dezenvolvimentu setór privadu no promove kresimentu ekonómiku, kria oportunidade empregu no hamenus kiak.

Partisipa iha forum foinsa’e Kompetisaun Negósiu Inovativu III MTCI 2022 ne'e mak hanesan Carlos Ximenes (DGI), Bernadino de Menezes (DN-ADMPMEs), Florêncio Sanches (Direktur Ezekutivu SERVE I.P), Filomeno M. Belo (Direktur Ezekutivu IADE), José de Jesus Barros Leong (Reprezentante husi Xefe Gabinete Primeiru-Ministru no Koordenadór Komité CI-CCVEPL), Higino da Costa Freitas, (Diretór Kompania ACELDA), Amilcar Cabral da Silva (Diretór Eskola Sekundária Téknica Vokasionál Dom Bosco Fatumaca), Jacinto Paijo (Diretór Ezekutivu CLN), reprezentante administradór sira hosi rejiaun ponta leste, komandante Polísia Munisípiu Baukau, ONG sira, partisipante sira mai hosi aplikante forum foinsa’e no konvidadus tomak.