Dili, 10 Novembru 2023 - Primeiru Ministru (PM), Kay Rala Xanana Gusmão, hateten katak nia la simu desizaun juíz Tribunál Distritál Dili (TDD) ne’ebé notifika hodi hasai obrigatóriu família uma kain hitu (7) ne’ebé tinan 46 ona sira hela iha aldeia Bekusi Kraik, suku Becora, postu administrativu Cristo Rei, munisípiu Dili, iha sesta dadeer (10/11/23) ne’e.

"Ha'u mai iha ne'e hanesan Primeiru Ministru, ha'u la simu imi (juíz) nia desizaun kuandu imi mai hasai arbiru populasaun nia sasan no soe arbiru hanesan ne'e. Imi-nia desizaun ne'e la respeita ona povu nia direitu umanu. Ne'e duni, ha'u prontu toba hodi haree to'ok imi-nia desizaun sira ne'e," dehan PM Xanana ho hirus.

Xanana bainhira to’o Becora, ho hirus hala’o kedas intervensaun ba asaun hosi ekipa TDD, autoridade polísia, ekipa jestaun merkadu no ofisiál justisa ne’ebé foti sai ona komunidade sira-nia sasan hosi uma laran, sobu no soe ba liur, no tula ba kareta leten.

Iha intervensaun ne’e, PM Xanana hamutuk ho vítima sira foti filafali sira-nia sasan ne’ebé soe arbiru iha uma oin, lori fali ba idak-idak nia uma hodi hein juíz sira-nia desizaun. Xanana informa katak, nia la kontra desizaun tribunál nian, maibé husu atu juíz sira tetu filafali sira-nia desizaun hodi haree ba interese povu nian.

Xanana deklara katak nia sei kontinua defende família uma-kain hitu (7) ne’ebé sofre ba ezekusaun mandadu hosi TDD hodi hasai sira hosi rai ne’ebé tinan 46 ona sira hela ba.