Bobonaru, 07 Outobro 2023 - Primeiru Ministru (PM), Kay Rala Xanana Gusmão, dezafia igreja katólika Timor-Leste atu investe maka'as hodi hadi'a kualidade edukasaun iha Universidade Katólika Timorense (UCT, sigla portugés) inklui eskola hotu hosi igreja katólika nian. Xanana mós husu ba iha Bispu Dioseze Dili, Maliana, no Baucau atu tuur hamutuk ho padre no madre sira hodi diskute mudansa ba sistema edukasaun iha UCT nian atu bele diferente ho universidade privadu no institute superior sira seluk ne'ebé mak eziste iha Timor-Leste. 

"H'au ko'alia kona-ba universidade atu hasa'e kualidade ensinu iha Timor-Leste, maibé ha'u ba iha Balide iha universidade katóliku,  mais ha'u desisionadu tanba universidade sira, UNDIL, UNPAZ, UNTL sira hotu hanorin enfermajen, no universidade katóliku mós hanorin fali enfermajen. Universidade katólika tenke hanorin filozófia atu sai exelente iha rai ida ne'e, no hanorin lisaun sira uluk nian atu prepara sidadaun ba futuru nasaun no igreja nian", dehan PM Xanana iha diskursu ba selebrasaun misa eskola Koléjiu Infante Sagres Maliana, Bobonaru ba dala-75.

PM Xanana dehan tan katak, universidade katólika iha ninia misaun boot ida maka, atu hasa’e kualidade edukasaun, disiplina no moris nu’udar sarani ne'ebé loloos. Tanba ne’e nia dehan katak iha tinan 2008 to'o 2009 ko’alia tiha ona atu harii Universidade Katólika ida ne'ebé mak exelente hodi forma lideransa rai ida ne'e nian ba futuru. Hatan ba preokupasaun ne’e, Bispu Dioseze Maliana, Noberto do Amaral, rekoñese problema edukasaun iha Timor-Leste sei hasoru dezafiu oioin no parte igreja rasik sei tuur hamutuk hodi hadi'a no aposta maka'as iha kualidade edukasaun. Igreja sei kria mós regra ba eskola hotu igreja katólika nian, hodi mantein ninia disiplina nune'e motiva estudante sira bele aprende no estuda hodi sai ema ida edukativu tuir Igreja nia hanorin.